Internacia Fervojista Esperanto-Federacio (IFEF)
64-a Internacia Fervojista Kongreso (IFK) 19-25.05.2012

Herzberg - la kongresurbo


HERZBERG AM HARZ, LA KONGRESURBO DE LA 64-a IFK,

kiu de julio 2006 havas la oficialan kromnomon: 'la Esperanto-urbo', prezentos sin al internacia partoprenantaro, al amasmedioj, al ĉiuj vizitantoj.

 Herzberg kun siaj 14.000 loĝantoj situas sudrande de la nacia parko Harz. Unuafoje menciita kiel burgo Hiirsberc en 1143, ĝi fariĝis posedaĵo de la Welf-oj en 1158 per Henriko la Leono.
La nuna kastelo estiĝis en 1510 kaj estas la plej granda faktrabkonstruaĵo en Malsupra Saksio. En unu alo troviĝas la distrikta tribunalo, en alia la muzeo kaj eleganta restoracio.
La kastelturo kun siaj 8-angula tegmento, horloĝo kaj riĉaj figuraj skulptaĵoj estas majstroverko de la renesanco.

Belaj fotoj kaj pliaj informoj pri la historio de la urbo, la vidindaĵoj, legendoj, interesaĵoj ankaŭ en Esperanto estas legeblaj sur la oficiala hejmpaĝo de urbo Herzberg am Harz: http://herzberg.de
Tie vi trovas detalojn ankaŭ pri la belaj ekskursceloj en la regiono kaj pri la kvar vilaĝoj (Lonau, Sieber, Scharzfeld kaj  Pöhlde), kiuj apartenas al Herzberg.

Jen estas la nova multlingva inform-paĝo de Herzberg - la Esperanto-urbo, kie oni povas regule legi pri aktualaĵoj, okazaĵoj, Esperanto-rilataj eventoj kaj trovi multajn fotojn pri ili.

Prezentadmaterialo kun fotoj: Herzberg - la Esperanto-urbo (.pdf 3.4 MB)
Fotoserion pri Herzberg kaj la regiono far fotisto-artisto vi trovas ĉi tie. (5 MB)

Prezentado de kongresurbo kun detaloj pri vidindaĵoj (kompilita de István Gulyás, redaktoro de la gazeto Internacia Fervojisto), kun aldonaj tekstoj de Zsófia Kóródy:
Herzberg am Harz

Herzberg am Harz estas ĉarma, idilia urbo en Germanio. Ĝi situas meze de la lando, ĉe la suda flanko de la Harz-montaro. Multnombraj trankvilaj anguloj kun malnovaj faktrabdomoj prezentiĝas por la vizitantoj dum la urborigardo. Meze en la centro troviĝas la 6,88 ha granda Juess-lago kun flegataj gazonoj, parkoj kaj subĉiela naĝejo. La rondvojo laŭ la lagetbordo taŭgas ankaŭ por handikapuloj kaj infanĉaroj. Novaĵo estas la arbo-instrupado ĉrikaŭ la lago, kie vi povas legi pli ol 50 arbonomojn ankaŭ en Esperanto. La urbo prezentas multflankan oferton por individua feriado, kaj estas ideala elirpunkto por sperti la belecojn de la tuta Harz-regiono.

La urbon unue menciis dokumento en la 12-a jarcento. Dum la jarcentoj la urbo kontinue evoluis, estas tradicioriĉa urbo kune kun la kvar antaŭurbaj vilaĝoj: aerkuraclokoj Lonau kaj Sieber, kaj la ripozlokoj Pöhlde kaj Scharzfeld.

La plej impona konstruaĵo de la urbo estas la 950-jara kastelo „Welfenschloss”, kiu estas la plej granda faktraba kastelo en Malsupra Saksio. La malnova, nobela familio Welf ekde 1158 posedis la kastelon ĝis 1866. La plej konataj familianoj estis Henriko la Leono (Heinrich der Löwe) (1129-1195), kaj diversaj germanaj kaj anglaj reĝoj. La kastela muzeo prezentas unu el la raraj faksimiloj de la evangelia libro de Henriko la Leono, unu el la plej belaj ilustritaj manuskribaĵoj el la germana mezepoko. Dum la jarcentoj la kastelo estis uzata kiel monta fortikaĵo, duka rezidejo, dukvidvina loĝejo, ĉaskastelo kaj administrejo. La nuna kastelo estis rekonstruita en 1510 post detruiga fajro. La plej aĝaj partoj de la nuna kastelo originas el la 16-a jarcento. La kastelo havas kulturan centron kun muzeo, kiu prezentas la ekonomian kaj socian historion de la kastelo kaj de la urbo Herzberg, kavaliran salonon, kiu havas lokon por 120 homoj kaj estas uzata por koncertoj, prelegoj, konferencoj, ekspozicioj kaj festadoj, eĉ en la kastelo troveblas kastela restoracio.
En la plej supra parto troviĝas la Esperanto-muzeo kun konstantaj informtabuloj en Esperanto, angla kaj germana lingvoj. En kelkaj vitrinoj Interkultura Centro Herzberg prezentas porokazajn ekspoziciojn pri diversaj temoj, ekz. pri historio, literaturo, kolektaĵoj, movadaj eventoj.

La urbo havas imponajn burĝdomojn kaj eksajn mastrajn domojn en kelkaj stratoj de la malnova urboparto. La harmoniaj faktrabfasadoj montras la reprezentadvolon de la riĉa burĝaro kaj ties imagoj pri estetika arkitekturo dum tiu tempo. En 1929 la tiama vilaĝo Herzberg am Harz ricevis la urborajtojn laŭ dekreto de la Prusa Ŝtatministerio. La 1-an de julio 1972 la najbaraj vilaĝoj Lonau, Sieber, Pöhlde kaj Scharzfeld estis unuigitaj kun Herzberg al unueca komunumo.

Jam en la jaro 1868 Herzberg rekte konektiĝis al la fervoja linio Northeim-Nordhausen, kiu ekde la malfermo de la intergermana limo la 12-an de novembro 1989 iom post iom rericevis sian iaman gravecon.

La malnova urbodomo troveblas en la centro de la urbo. Tiu konstruaĵo iam estis fajrobrigada domo, kiu estis rekonstruita en la jaro 1905 kiel urbodomo. Post la dua mondmilito denove okazis internaj ŝanĝoj en la domo, kiam aldoniĝis novaj ejoj kaj balkono. Nuntempe en la domo troviĝas la Turisma Informejo kun granda esperantlingva bonvenigtabulo, la urba arkivo kaj Esperanto-arkivo por Herzberg.

Laŭ la decido de la urba konsilantaro la urbo ekde julio 2006 uzas la oficialan kromnomon „ la Esperanto-urbo”. Tio estas samtempe bonŝanco kaj defio por la tuta Esperanto-movado. Multaj Esperanto-objektoj, konstruaĵoj kaj informtabuloj troveblas dise en la urbo. Por ni estas la plej grava la Gießner-monumento, kiu staras ĉe la parko de la stacidomo. La monumento estas bela minejtrajna vagoneto kun dulingva biografio pri la elstara fervojista Esperanto-pioniro Joachim Gießner, kiu vivis dum ĉ. 40 jaroj en Herzberg.

En la urbo estas multaj (Zamenhofaj kaj Esperanto-objektoj, ZEO-j) inter ili elstaras la Zamenhof-monumento el blanka marmorostarigita de Interkultura Centro Herzberg en decembro 2009 por memori la 150an naskiĝtagon de la iniciatoro de lingvo Esperanto.

Estas ege interesa la nova urba rondvojo „Akvo-8”, kiu enhavas 18 informtabulojn kun resumoj en Esperanto pri la historio de la urbo. En Herzberg troveblas multaj restoracioj kun esperantlingva manĝokarto, kelkaj hoteloj, kaj komfortaj apartamentoj en privataj domoj.

La plej grava konstruaĵo en la urbo por la esperantistoj estas la „Interkultura Centro Herzberg”. Nuntempe ĝi havas diversajn funkciojn, kiel sidejo de la regiona Esperanto-Societo Sudharco, filio por klerigado kaj kulturo de Germana Esperanto-Asocio, sidejo de la Asocio de Germanaj Esperanto-Instruistoj, la landa sekcio de ILEI, kursejo kaj ekzamenejo. La Centro plenumas ankaŭ la rolon de organiza kaj informa centro pri Esperanto en la urbo Herzberg am Harz.

Do mi povas konstati, ke la 64-a IFEF-kongreso okazos en inda urbo por la fervojistaj esperantistoj, kaj mi esperas, ke ĉiuj partoprenantoj ĝuos la kongreson kaj la etoson en la „Esperanto-urbo”.

BONVENON!

IFK © 2011 LA-Arts